Post

ድመት  ነብር  ላይሆን

ድመት ነብር ላይሆን

Admin

By Admin

ጅራቱ  ለንቁጦ … ፋይዳ  አልባ  አካሉ
ቆዳው  ቢዥጎረጎር … ላይገጥም  የስም  ቃሉ
በቀን  ቀን  ሊያነባ … በምሽት  ቅዥቱ
አሻፈረኝ  ብሎ  … ድመት  የማጀቱ
ካልነበርኩኝ  ካለ … እንደጫካው  ብርቱ

ይጋመዳል  ሲሉ … ዘር  ድሩ  ሲፋተል
ሲጠራ  ሲጣቀስ … ከነብር  ሲማሰል
በኢምንት  ባህሪው … ከቁጡው  ሲቃጠል

ድርሻ  አለው  ሲባል … የቅም  ቅማንቱ  ውርስ
የአያቱ  ኑዛዜ … ዝብርቅ  የቆዳ  ልብስ
ልቡን  አስቆብቁቦት …  ጎሮ  ዋዩን  ውሮ
ዱር  ካልገባሁ  ካለ … የእኛው  ድመት  ነብሮ
ቢፈታ፣ ቢለቀቅ … እስቲ  ምን  አለበት
ድመት  ነብር  ላይሆን … አጉል  ባይሞገት?

አይጥ  አይታው  ብትሮጥ … ልቡ ትምክህት  ቋጥራ
ጫጩት  ብትጮህለት … ተነፍቶ  በጉራ
ካአለ  አሻፈረኝ … በረሃ  ሊቃትት
ከዘሩ  ተጣልቶ … በዘሩ  ሊሸፍት

ነብርን  መሆን  ሽቶ … የድመት  ተላላ
ዱር  ካልገባሁ  ካለ … አድኖ  ሊበላ
ምንድነው  ዘራፉ … ሽርጉድ፥ብትኑ
የሰልፉ ጋጋታ … ድምፅ ፣ ሪፈረንደሙ
የአዳም  ዘር  መድከሙ … ለማጀቱ  ድሙ?

በሚዳቋ  አጥንት … ሳምባ  በዪው  ገዝፎ
ፍየል  ፈረስ  ላያልቅ … በረት ፣ ጋጣ  ጥሶ
ቅዥት  ራእይ  ሆኖ … ጫካ  ውሎ  ውሮ
ነግሶ  ላይመለስ … አውሬ  ሆኖ  ነብሮ

ወጥመድ  አንጀት  አልባው … ሞልቶ  በከተማው
የጓዳውን  ጥሬ  … አይጥ  ላይቃመው
እስቲ  ለምንድነው  … እናቲቱ  የቆጨሽ
ሂድ  ሳትዪው  ልሂድ  … በቃኝ ፣ ፍቺኝ  ሲልሽ?

ዘልቆ  ላያዘልቀው … ሲለቀው  ቅዥቱ
ደርሶ  ውል  ሲለው … ሳንባና  ወተቱ
የሚታደን  ጠፍቶ … ሲበዛ አዳኙ
አይቀር  መቼም  ደሞ… ይመጣል  ቀን  ቆጥሮ
ያልነበረው  ውሮ  … ጭራውን  ቀስሮ
እንደ  አሞራ  በሮ

ታድያሳ  ለምን ነው  … እንዲህ  መጨነቅሽ
በድመቱ  መጀን  … እናት  መለመንሽ
ልቀቂው  በሞቴ … ይሂድ በፈጠረሽ
ውሮ ጫካ  ነብሮ … እኔም ወጥመድ ልስጥሽ፤

ተክልዬን  ልቀቂው … ይሂድ  በእስጢፋኖስ
ለቀለብ  አይደለ … ያለመድነው  ወትሮስ፤

ግን ብቻ ታሪክ ነው … ታሪክ ነው የሚገርም
ተኩላ  ሄደ  ብሎ … በግ  በሃዘን  ሲታመም።

1984 ዓ.ም.

Comments are closed.